Numbers 21

Hi Misak ni Tetal Tesa Xil Langas Purun Mol-Isrel Xil

Namba 21:4-9

4Mol-Isrel xil labe reling Vathu Hor e langgusil suse xa ba mistal e Tas te Pili. Xil lapol ni mak vengan iexil bei xa ha likapis lixo haxot te tan na mol-Edom xil. E melele ladi tamu e suse, tinexil tamure. 5Ma laseputut ba mi Hi e Mosis labit, “?Veneh ma oteleh rerat xamem ra hal Isip e odel xamem mamei e uruvuol ak tengan malel? E rute ak, anien e oei tovuol vari tang. !E anien tesa ak, iemem ti tavei mun mava ni!” 6Ma Hi misak ni tetal tesa xil lastal mi mol-Isrel xil e langas vin xil holu lalel. 7Melele xa di lalel mak, moletin xil lamei mi Mosis e labit rerat tesaen nae xil mini labit, “Xamem matenem tesa e mateseputut teha mi Iahova e minuk. Usis li mi Hi tengan ileh rerat tetal xil ak lihe reling xamem.” Ma Mosis misis ve moletin xil. 8Di, Iahova biteni mi Mosis bit ha ipol ni mavulut aean brons xa mei ihur nanao te tetal tei. Ti, iti xati ite pos tova xa teviei, ma melele xa tetal tei ingas moletin tei, xi mikila ilepet meten iha ni e mei ilonge ihos rilomun. 9Ma Mosis pol ni tetal tei ni mavulut aean brons tei e miti xati de nesao e pos tei xa teviei. E ngan xil xa tetal xil langas xil, melele xa lalepet metexil ba ni tetal xa Mosis pol ni ni brons, xil mei lalonge bos rilomun.
Copyright information for TVK